Ko'alia kona-bá osan ida ne’e sensitivu iha relasaun? Maibé ida ne’e importante atu ko’alia

Ko'alia kona-bá osan ida ne’e sensitivu iha relasaun? Maibé ida ne’e importante atu ko’alia

 

 

 

Ema barak mak senti bainhira iha situasaun namora hela difisil ba sira atu ko’alia ba malu kona-bá osan, tambá sira senti ida ne’e topiku ne’ebé mak sensitivu loos atu ko’alia. No ko’alia kona-bá osan dalaruma halo ema senti la konfortavél iha relasaun no ema balun bele mos konsidera nia parseiru ka paseira ne’ebé hahu topiku ida ne’e hanesan ema nebe matan osan. Maibé se bainhira ita la ko’alia antes kona-bá topiku ida ne’e dalaruma bele hamosu problema bainhira harii ona familia. Tambá problema barak akontese iha familia sira ne’ebé relasiona ho osan.

 

Entaun importante loos atu ko’alia kedas kona-bá osan antes kaben, no ita bele ko’alia ho ita nia parseiru ka parseira kona-bá parte sira ne’e:

 

1.       1. Oinsá ho ita nia kostume utiliza osan

Ita presiza ko’alia no halo diskusaun antes ho ita nia parseiru/a, kona-bá ida-idak nia kostume utiliza osan. Ita nia maneira utiliza osan ho ita nia parseiru/a ni’an ne’e hanesan ka diferente, ezemplu hanesan ita ema ne’ebé bainhira iha osan husi rendimentu babain sempre jere ho di’ak, halo budgeting klaru no uza osan poupa ho kuidadu loos, maibé diferente ho ita nia parseiru/a nia ema ne’ebé bainhira iha osan la uza ho kuidadu maibé gosta gasta hotu lalais ba nia estilu moris no la hanoin ba iha futuru. No bele mos kontrariu fali entre ita ho ita nia parseiru/a.

 

No se akontese situasaun sira hanesan ne’e ita bele apar ho ita nia an ka lae, no ita bele simu nia kostume sira ne’e ka?

 

Se ita la simu saida mak ita bele halo, hakarak hapara relasaun ka koalia hamutuk hodi bele muda kostume sira ne’e. Tambá sei iha situasaun namora ita sei bele iha tempu atu tetu desizaun sira ba oin ne’e atu halo oinsá. No bainhira ita deside atu simu kostume sira ne’e no sente ida ne’e di’ak hela, entaun ita rasik hatene ona konsekuensia saida mak  ita hasoru iha futuru no ita sei la hakfodak ho toman sira ne’e mosu bainhira forma ona familia.

 

Tambá sé ita la koalia antes mak, bainhira mosu kostume utiliza osan ne’ebé diferente hafoin ita forma tia familia ida ne’e bele halo ita hakfodak no sei mosu problema barak iha familia no dalaruma rezolve difisil bele akontese divorsiu.

 

2.   Oinsá ita nia planu ba oin kona-bá osan

Ita presiza hatene entre ita ho ita nia parseiru/a nia hanoin kona-bá planu utiliza osan iha futuru ne’e oinsá. Iha planu hanesan ka lae, keta ida hakarak uza osan halo festa kazamentu bo’ot, tambá senti momentu ne’e dala ida de’it iha moris. Maibé ida seluk senti ida ne’e estraga liu osan tambá sei iha buat barak ne’ebé hakarak atu halo hafoin kaben hotu. Hanesan hakarak uza osan ba halo uma atu nune’e la presiza hela ho familia, planu iha oan atu tau osan hanesan poupansa ba oan nia estudu, uza ba investe ba negosiu ka ekipamentu ruma ne’ebé bele hatama fali osan mai ita, hakarak uza osan ba pasear iha rai liur hodi hetan experiensia barak.

 

Hirak ne’e ita ho parseiru/a presiza halo diskusaun antes atu bele hatene ita nia maneira hanoin no planu ne’e oinsá hanesan ka lae, se la hanesan solusaun saidá mak ita sei halo hodi hare ba ida ne’e. Atu nune’e labele hamosu konflitu iha tempu tuir mai.

Tambá hanoin no planu utiliza osan iha futuru la hanesan ne’e dalabarak bele hamosu konflitu bainhira ita iha situsaun finanseiru ne’ebé difisil, tamba ita sei buka malu nia sala atu fo sala ida seluk, tambá hare ba planu ne’ebé mak la hanesan.

 

3.   Osan ne’e uza ba sé de’it

Antes atu kaben ita tenki ko’alia kedas, bainhira kaben ita ho parseiru/a nia rendimentu ne’e atu uza ba sustenta familia ne’ebé ita na’in rua foin harii ne’e mesak de’it ka sei iha responsavél ba membru familia seluk, hanesan kada fulan haruka osan ba inan-aman no mos selu alin sira nia eskola. Ida ne’e ita tenki hatene antes hodi bele tetu no hare ba ita na’in rua nia rendimentu no budget husi salariu ne’e to’o ka lae atu sustenta tan familia seluk. No se la to’o solusaun saidá mak ita bele buka hamutuk, aumenta tan rendimentu husi fatin seluk ka muda ita nia data no tinan forma familia atu nune’e bele iha tempu atu aumenta rendimentu husi fatin seluk tan, atu nune’e bele nato’on hodi bele sustenta ita nia familia ne’ebé foin harii no mos membru familia seluk.

 

Tambá la koalia antes bainhira kaben ona mak foin hatene no uza osan ba familia ne’ebé foin harii la sufisiente, iha fatin seluk sei iha responsavél seluk tan ida ne’e bele hamosu problema iha uma laran. No mos tempu seluk bele akontese fo subar osan, tambá ta’uk iha problema se bainhira fo parseiru/a hatene. Entaun ida ne’e bele akontese konflitu iha futuru, tambá sente la transparante entre parseiru/a.

 

4.   Antes ne’e iha deve ka lae

Antes kaben, tenki ko’alia no husu klaru ba malu antes ne’e iha deve ka lae entre ita ho parseiru/a. Sé iha deve, sé mak sei responsavél atu selu, ema ne’ebé deve mesak ka ita na’in rua tau osan hamutuk mak selu no bainhira mak atu selu, antes ita kaben ka forma familia hotu mak selu neneik, no deve ne’e nia montante bo’ot ka ki’ik no mos ne’e deve ba dala hira nian no deve uza ba halo saidá. Ida ne’e parte ida atu ita hatene ema ne’e nia kostume ne’e oinsá, keta halo devedor ida. Entaun ida ne’e bele estraga ita iha futuru se bainhira deve ne’e sai hanesan nia toman ona.

Bainhira ita la ko’alia antes mak kaben ona derepenti ema mai sisi deve foin ita hakfodak no ita rasik la hatene deve sira ne’e, ida ne’e bele halo ita nia fundu sira ne’ebé ita aloka didi’ak ona ba ita nia nesesidade familia nian bele sai sabraut tambá ita presiza selu deve sira ne’e. Ida ne’e bele halo ita nia nesesidade familia nian la sufisiente entaun bele mosu problema no halo ita mos hanoin barak. Entaun di’ak liu mak ko’alia antes molok deside kaben.

Di’ak loos ba ita atu ko’alia kona-bá osan atu nune’e ita bele diminui problema balun bainhira forma familia. Maske ita senti la konfortavél mos di’ak liu mak koalia antes atu nune’e ita bele prevene problema bo’ot iha futuru.

Espera ida ne’e bele ajuda imi iha relasaun no mos osan nian.