Tipu Ema ni'an iha utilizasaun Osan

Tipu Ema Ni’an iha Utilizsaun Osan

Ita ema hola parte ba  tipu oi-oin iha utilizasaun osan ni’an, dalabarak ita la hatene ita kategoria iha tipu ida ne’ebé.  Ho ida ne’e mak halo ita sente katak osan ne’ebé mak ita utiliza dalabarak hotu sem ita rasik konsiente ba osan sira ne’e.

Oinsa  tuir imi nia hanoin imi sente ida ne’e ka la’e?

Entaun ita presiza hatene ita nia an kategoria iha tipu ulizasaun ba osan ni’an ida ne’ebé, hodi nune’e ita bele identifika ita nia osan sira ba ne’ebé no gastus ba saida.

Ita ema hola parte iha utilizasaun osan ni’an iha tipu ha’at.

1.   Tipu Gastador

Ema ho tipu gastador sira, babain ema sira ne’e gosta kompras hela de’it ba sasan luxu, branded no saida de’it mak trend hela iha tempu ne’eba. Sira ema ne’ebé mak ladun preokupa ho sasan nia presu, importante mak sasan ne’e bele satizfas ba sira nia hakarak no mos bele up to date hanesan ema seluk ni’an. Ema ho tipu sira ne’e babain sira sosa sasan la’os tamba sira nia nesesidade presiza maibé tamba de’it sasan sira  ne’e famozu no ema ne’ebé mak utiliza ema kosidera nia iha kalse aas ka riku, entaun sira mos tenki sosa sasan sira ne’e hodi uza atu bele kompete ho ema seluk no bele tama iha klase hirak ne’e. Dalabarak sasan ne’ebé mak sira sosa ladun iha valor ba sira nia nesesidade. Ema ho tipu ida ne’e mos dalabarak sira obriga an hodi deve tamba de’it atu sosa sasan ne’ebé mak sira hakarak.

2.   Tipu Rai Osan

Ema ho tipu rai osan kontrariu fali husi ema gastador, tipu ema rai osan sira ne’e babain sempre poupa sira nia osan. Sira la’os poupa ba osan de’it, maibé iha buat seluk mos sira poupa hotu kedas, inklui hamate ahi bainhira sai husi kuartu laran ida ne’e hanesan maneira ida atu diminui gastus ba pulsa eletrisidade ni’an. Ema ho tipu ida ne’e mos la toman ho kompras hela de’it iha kada loron, no mos sira so sosa de’it sasan sira ne’ebé mak sira konsidera hanesan importante duni ba sira no sira presiza duni iha sira nia nesesidade kada loron.

3.   Tipu Grupu Sosa

Ema ho tipu ne’ebé kategoria grupu sosa mak sira ne’ebé babain gosta kompleta sira nia satizfasaun emosional liu husi gasta osan hodi sosa sasan. Ema ho tipu ida ne’e labele atu tahan sira nia hakarak sira bainhira hetan sasan ne’ebé sira gosta, maske sasan sira ne’e la’os nesesidade ne’ebé mak sira presiza. Grupu sosa sira bainhira hetan sasan ne’ebé sira sente furak iha sira nia matan sira tenki sosa la preokupa ho sasan ne’e kualidade ka lae, no sira presiza ka la’e. Tamba dalabarak sasan ne’ebé mak sira sosa uza de’it dala ida no sira la uza tan ona.

4.   Tipu Investedor

Ema ho tipu investedor sira sempre konsiente tebes ba sira nia osan. Sira hatene tuir sira nia osan gasta ba ne’ebé no sira komprende tebes sira nia kondisaun osan nian, hodi aloka ba parte ne’ebé de’it. Investedor sira matenek tebes, atu buka maneira hodi halo sira nia osan bele investe ba fatin ka intrumentu ruma ne’ebé bele produz osan ba sira. Entaun liu husi sira nia investimentu mak osan ne’ebé sira iha bele sai barak liu tan. Tamba sira nia income mai husi fatin barak ona.

Entaun ita hatene ona kona-ba tipu sira husi ita ema iha utililizasaun osan ni’an. Espera ida ne’e bele ajuda ita  atu identifika ita tama iha tipu ida ne’ebé no ita bele halo mudansa ba ita nia an ka lae?