Maneira buka osan ba Estudante sira

Maneira buka osan ba estudante sira, ne’ebé mak sei la interompe estudu.

Ita bo’ot estudante, sente osan ne’ebé mai husi inan-aman la to’o no hakarak iha income rasik?

Ahh dalabarak hanesan estudante ita depende de’it ba inan-aman, entaun dalaruma mos osan ne’ebé sira fo la sufisiente mai ita nia nesesidade loron-loron ni’an. Ho ida ne’e halo ita komesa hanoin barak tamba ita nia presiza sira labele kompleta hotu, tamba osan ne’ebé inan-aman fo mai ita la naton. 

Entaun duke ita hanoin barak ba nesidade ne’ebé mak ita labele kompleta, di’ak liu mak ita buka solusaun ho maneira buka osan balun ne’ebé sei la interompe ita nia estudu. Tamba ita nia estudu mos importante tebes mai ita. No ita mos tenki iha osan ne’ebé sufisiente atu tulun ita hodi kompleta nesesidade estudu ni’an. 

Hakarak buka osan entaun bele koko tok maneira balun ne’ebé mak tuir mai ne’e.

 

Negosiu online

Negosiu online sei la interompe ita nia estudu, tamba ita so post fotografia sira liu husi media social de’it.  Ne’ebé ita uza de’it ita nia telefone ho media sosial atu bele halo promosaun no fa’an sasan sira. Liu husi ita nia promosaun bainhira ema hare iha ita nia media sosial no sira gosta, entaun sira halo negosiasaun ho ita, bainhira sira deside hodi sosa, ita bele lori sasan ba sira nia fatin. Tempu atu lori ba ne’e depende de’it ba ita halo konkordansia ho kliente sira atu nune’e ita bele lori ba iha tempu ne’ebé mak livre husi ita nia estudu. Entaun ida ne’e sei la interompe ita nia estudu.

Negosiu Fotokopia

Maneira buka osan ida ne’ebé estudante bele halo mak hanesan negosiu fotokopia. Se ita iha printer iha uma ka ita nia kos, ita bele loke negosiu fotokopia, hanesan estudante klaru katak ita iha kolega barak ne’ebé mak presiza atu fotokopia no print sira nia traballu eskola sira. Entaun ita bele aproveita ida ne’e ho dehan ba sira kona-ba ita nia negosiu, bainhira iha ita nia turma laran iha traballhu no presiza atu print ka fotokopia ita bele husu kolega sira atu print no fotokopia iha ita de’it. Entaun bainhira tempu balun sira presiza atu print ka fotokopia sedu hodi hatama iha dader, duke sira dader mak ba rental di’ak liu kalan sira bele haruka ona husi WhatsApp ba ita no ita bele print kedas no dader lori ba sira de’it. Ida maneira ida hodi hafasil sira no fo mos lukru mai ita.

 

Fa’an Pulsa Telemovel

Hanesan estudante ita konñese no iha ligasaun ho ema barak, liu husi eskola, grupu no organizasaun sira ne’ebé ita inklina an ba no mos vizinñu sira ne’ebé mak ita hela besik. Entaun di’ak tebes ba ita atu fa’an pulsa telemovel ba ema hirak ne’ebé ita konñese, ida ne’e hanesan parte ida husi ita atu bele buka income ba ita nia an nu’udar ema estudante ida. Tamba pulsa ita bele lori ba fatin ne’ebé de’it, ida ne’e hafasil los ita atu fa’an pulsa ne’e ba ema se de’it no iha fatin ne’ebé de’it. Fa’an pulsa sei la interompe ita nia estudu tan ne’e di’ak mai ita atu bele buka income liu husi fa’an pulsa.

 

Fa’an Etu Falun (Nasi bungkus)

Ida ne’e mos bele sai hanesan income ida mai ita se bainhira ita estudante universitariu, dalabarak hanesan estudante universitariu ita iha aula ne’ebé dalaruma tama dala rua ho espasu tempu ne’ebé besik ka bele mos do’ok uitoan. Hare ba ida ne’e ita bele aproveita hodi fa’an etu falun, liu husi hatete ba kolega sira atu bele hameno ka order etu husi ita no dader ita bele hader sedu hodi prepara etu sira ne’e, hafoin lori ba ita nia kampus atu fo ba sira tuir kuantidade ne’ebé mak sira hameno. Ida ne’e sei la interompe ita nia estudu tamba ita fo ba sira antes aula hahu no bele mos aula remata ona. No ita mos nafatin partisipa iha aula sira ho di’ak, maske atividade sira ne’e kolen maibé bele tulun ita iha finanseiru atu ajuda estudu.

 

Mestri Privadu

Ita mos bele sai mestri privadu ba estudante sira ne’ebé mak presiza, tamba inan-aman barak mak hakarak nia oan sira aprende iha eskola no mos iha uma hotu, atu nune’e sira nia oan bele iha kapasidade ne’ebé mak di’ak. Entaun ida ne’e hanesan oportunidade di’ak ida mai ita, se ita iha kapasidade no abilidade ba materia balun. Babain mestri privadu sira ema selu sira konta bazeia ba kada oras ne’ebé mak sira hanorin, se ita iha estudante barak no konta oras entaun semana ida mak ita hanorin to’o oras hitu ka liu, ita bele hetan income barak. Income sira ne’e sei tulun ita iha estudu. Ita so ba hanorin estudante sira iha tempu livre de’it entaun ida sei la soke malu ho ita nia estudu.

 

Sai tradutor

Se ita iha abilidade ba lingua balun entaun ida ne’e di’ak tebes ba ita atu sai tradutor, tamba iha instituisaun, kompanha no organizasaun barak mak presiza ema atu sai tradutor ba sira nia servisu balun. Entaun ida ne’e bele sai hanesan dalan ida mai ita atu hetan income. Se ita mak iha konesimentu ba lingua barak entaun tulun los ita atu sai tradutor. Servisu tradutor ne’e ita bele halo iha tempu kalan ka tempu livre sira, hodi nune’e fasil ba ita atu fahe tempu servisu no eskola. Ita bele hetan income barak husi ne’e se ita servisu ho professional no pontual tuir tempu ne’ebé determina.

 

Ida ne’e mak maneira balun ne’ebé hanesan estudante bele uza hodi hetan osan, espera maneira sira ne’e bele tulun imi hodi buka income ba imi nia an nune’e bele tulun imi, iha imi nia estudu.